Պատերազմը չի ավարտվել, այն շարունակվում է այս հանցավոր սահմանազատման ու սահմանագծման տեսքով․ Բագրատ Սրբազան

Պատերազմը չի ավարտվել, այն շարունակվում է այս հանցավոր սահմանազատման ու սահմանագծման տեսքով։ Այս մասին Հանրապետության հրապարակում հայտարարեց Բագրատ Սրբազանը։

«Կեղծ են բոլոր թեզերը, որ այսօր պատերազմ գոյություն չունի, և իբրև թե մենք ենք նպաստելու դրա վերսկսմանը։ Դա կեղծ է, քանի որ պատերազմ բերած իշխանությունը չի կարող պատերազմն ավարտել, լավագույն դեպքում այն մեզ տանելու է ամբողջական ինքնահանձնման՝ մեր հայրենիքի, պետության, արժանապատվության կորստով։ Պատերազմը չի ավարտվել, այն շարունակվում է այս հանցավոր սահմանազատման ու սահմանագծման տեսքով, որտեղ ոչ սահմանազատում, և ոչ էլ սահմանագծում գոյություն չունի»,- նշեց նա։

Բագրատ Սրբազանի խոսքով՝ միայն  խելագարը կարող է ձգտել պատերազմի․ «Բայց նաև միայն խելագարը կարող է ձգտել մուրացիկ խաղաղության, որն ինքնին պատերազմի ամենամեծ սպառնալիքն է։ Այս իմաստով վերստին ցանկանում եմ հիշեցնել, որ․ Հայաստանը չի՛ կարող լինել աշխարհաքաղաքական ուժերի բախման թատերաբեմ, որն այս իշխանությունների ձեռագիրն է, այլ պետք է գործի ուժային կենտրոնների շահերի համադրման սկզբունքով, գործընկերային կապերի, փոխգործակցության սկզբունքով։ Հրաժարվել «հակա»-ներով արտաքին քաղաքականությունից՝ դառնալով կանխատեսելի և վստահելի գործընկեր։ Հարաբերությունների վերականգնում  գործընկեր, դաշնակից պետությունների հետ՝ միևնույն ժամանակ ձեռք բերելով նոր դաշնակիցներ և բարեկամներ։ Եվ այս ամենի առանցքը, սկզբունքը, եթե կուզեք՝ «կարմիր գիծը», պետք է լինի սեփական հայկական օրակարգը՝ հեռու ծառայամտությունից և միայն արտաքին շահերի սպասարկումից»։

Անդրադառնալով համացանցում տարածված անտուն մարդուն իրեն նմանեցնելու մասին հրապարակումներին՝ Բագրատ Սրբազանն արձագանքեց․

«Ինչպես համացանցում տարածված անտուն մարդն է, որն իբրև ես էի, մատնվել այդպիսի թշվառության, այնպես էլ մեր ողջ ժողովուրդն է մատնված նույն տիպի թշվառության, տնազրկման, բնազրկման այս չարիքի կողմից։ Մեր՝ փողոցում գտնվելը՝ վերականգնելն է մեր տունը։ Իմ ժողովրդի դստեր վերքը նրանք բուժում էին արհամարհանքով և ասում՝ խաղաղություն է, մինչդեռ չկար խաղաղություն։ Պիտի ամաչեն, որ պղծության գործեր կատարեցին, սակայն այդպես էլ ամաչել չիմացան և մտքներում այդպես էլ պատկառանք չզգացին։ Այս մարգարեական խոսքերը չափազանց խորքային իմաստով արտահայտում են մեր իրականությունը, այնպիսի իրականություն, որը խաթարել է մեր ներքին անձնական և հավաքական խաղաղությունը՝ վերածվելով անպատվության, քաոսի, թշնամության, ատելության, անապագա անորոշության, դրանից բխած անսահման վախերի։ Նա խաթարել է մեր արտաքին քաղաքականությունը՝ պայմանավորված անվտանգային խնդիրներով, հատկապես հակառակորդ երկրի հռետորաբանությամբ և գործողություններով, անընդհատ ստորացնելով և նվաստացնելով, արտաքին աշխարհի բոլոր կողմերի և խաղացողների հետ տարերային, իրադարձային, ոչ թափանցիկ, անվստահելի, անկայուն և մուրացիկ և մշտապես անհասկանալի հարաբերություններով, որոնք, ցավոք, հանգեցրել են ինքնիշխանության, պետականության և իրավահավասարության կորստին՝ անընդհատ մեր ժողովրդի գլխին պահելով պատերազմի սպառնալիքի վտանգը»։