Պետդեպը մեկնաբանել է ԱՄՆ-ի հնարավոր ներգրավվածությունը Կովկասում հաղորդակցության ուղիների ապաշրջափակման հարցում

իացյալ Նահանգները աջակցում է Հարավային Կովկասում խաղաղության և կայունության խթանման ջանքերին և հետևում է տեղում ընթացող զարգացումներին: Այս մասին ճեպազրույցի ժամանակ հայտարարել է ԱՄՆ Պետդեպարտամենտի պաշտոնական ներկայացուցիչ Թեմի Բրյուսը՝ պատասխանելով Հարավային Կովկասում տրանսպորտային հաղորդակցությունների ապաշրջափակմանն ուղղված նախագծերի և այդ նախագծերին Միացյալ Նահանգների հնարավոր մասնակցության մասին հարցին:

Պատասխանելով հարցին, թե արդյոք Վաշինգտոնը աջակցում է Հարավային Կովկասի տարածաշրջանում տրանսպորտային ուղիների բացման հեռանկարներին, որը մի քանի օր առաջ Թուրքիայում հնչեցրել էր ԱՄՆ դեսպան Թոմ Բարաքը, Պետդեպարտամենտի ներկայացուցիչը նշել է, որ այս հարցը պետք է պարզաբանվի Սպիտակ տանը՝ նախագահական վարչակազմի դիրքորոշումը այս հարցում հասկանալու համար:

«Բայց կարող եմ ասել ձեզ, որ մենք, անշուշտ, աջակցում ենք Հարավային Կովկասում խաղաղության և կայունության խթանման ջանքերին: Եվ մենք հետևում ենք այնտեղ տեղի ունեցողին: Մենք հետևում ենք: Բայց ես ուզում եմ ավելին իմանալ ձեզ համար, և մենք դա կանենք», - ասել է Թեմի Բրյուսը:

Հիշեցնենք, որ մի քանի օր առաջ Թուրքիայում ԱՄՆ դեսպան Թոմ Բարաքը, մեկնաբանելով Հարավային Կովկասում տրանսպորտային ուղիների ապաշրջափակման թեման, ասել էր, որ, օրինակ, ԱՄՆ-ում նմանատիպ խնդիր կարող է լուծվել ճանապարհը 100 տարով վարձակալության տալով, որպեսզի բոլորը կարողանան օգտվել դրանից։

www.news.am

Լրահոս