«Պուտինը հոգնել է պատերազմից». Էլ ի՞նչ է ասել Թրամփը Ուկրաինայի և Ռուսաստանի նախագահների հետ բանակցություններից հետո

Ռուսաստանի և Ուկրաինայի ղեկավարների հետ հեռախոսազրույցներից հետո նախագահ Դոնալդ Թրամփը վստահություն է հայտնել, որ երկու պատերազմող երկրների միջև խաղաղ բանակցությունները շուտով առաջընթաց կգրանցեն, հայտնում է Fox News-ը։

Նա «հավատում է Ռուսաստանի նախագահ Վլադիմիր Պուտինի՝ խաղաղ համաձայնության հասնելու ձգտման անկեղծությանը»։ Թրամփը հայտարարել է, որ, իր կարծիքով, Պուտինը «հոգնել է պատերազմից»։

Հարցին, թե արդյոք Զելենսկին բավականաչափ ջանքեր գործադրո՞ւմ է խաղաղ բանակցությունների գործընթացին օգնելու համար, նա պատասխանել է. «Ավելի լավ կլինի ձեզ ասեմ մոտ երկու շաբաթից, որովհետև չեմ կարող ասել այո կամ ոչ»։ «Զելենսկին ուժեղ տղա է, և նրա հետ գործ ունենալն այնքան էլ հեշտ չէ։ Բայց կարծում եմ, որ նա ուզում է կանգ առնել։ Սակայն ես կարող էի այս հարցին ավելի լավ պատասխանել երկու կամ չորս շաբաթից։ Հուսով եմ, որ պատասխանը կլինի այսպիսին՝ նա ուզում է լուծել այս խնդիրը»,- ասել է Թրամփը։

ԱՄՆ նախագահը նաև անդրադարձել է վերջերս պաշտոնը ստանձնած Լևոն XIV պապին՝ հայտարարելով, որ նա կցանկանար նպաստել երկու երկրների միջև խաղաղությանը։ Թրամփն ասել է, որ «հրաշալի» կլիներ խաղաղ բանակցություններն անցկացնել Վատիկանում։

Ինչպես հայտնում է BBC-ն, Թրամփը նաև հայտարարել է, որ առայժմ չի ցանկանում նոր պատժամիջոցներ սահմանել, որպեսզի չվնասի խաղաղ գործընթացին։

Ըստ նրա, Ուկրաինայում հակամարտությունը պետք է մնար Եվրոպայի խնդիրը, ԱՄՆ-ն չպետք է միջամտեր, և եթե Ուկրաինայի հարցում էական առաջընթաց չլինի, ԱՄՆ-ն իր դերը կարգավորման հարցում կզիջի Եվրոպային։ Նա հավաստիացրել է, որ ամերիկացի զինվորներ Ուկրաինայում չեն լինի։ Թրամփը հայտնել է, որ իր գլխում կարմիր գիծ կա, թե երբ ինքը կդադարի ճնշում գործադրել Ռուսաստանի և Ուկրաինայի վրա, բայց հրաժարվել է հստակեցնել իր հայտարարությունը։

ԱՄՆ նախագահը նշել է, որ կքննարկի Ուկրաինային զենքի մատակարարումների ավելացման հնարավորությունը և ընդգծել, որ ԱՄՆ-ն Ուկրաինային տրամադրել է «օտարերկրյա պետության համար ռեկորդային գումարներ»՝ մատնանշելով հակամարտության կարգավորման հանդեպ հավատը։

www.news.am

Լրահոս