
13-02-2025 | 09:27
Ռուսաստանի հավաստիացումները, թե Ուկրաինայի նախագահ Վլադիմիր Զելենսկին կորցրել է լեգիտիմությունը, Կրեմլի հայտնի տեղեկատվական գործողությունն են, գրել են Պատերազմի ուսումնասիրման ինստիտուտի (ISW) փորձագետները հերթական ամփոփագրում։ Կրեմլյան պաշտոնյաները այն ակտիվորեն առաջ են մղում վերջին շաբաթներին։
ՌԴ նախագահ Վլադիմիր Պուտինի խոսքերն այն մասին, թե Ուկրաինայում միակ լեգիտիմ իշխանությունը Գերագույն ռադան է, պարունակում են առանձնահատուկ իրավաբանական ժարգոն եւ հղումներ (հիմնականում սխալ կամ կտրված իրավաբանական համատեքստից) Ուկրաինայի Սահմանադրությանը եւ օրենքներին, գրել է ISW-ն։
Հավանաբար, Պուտինը միտումնավոր իր հայտարարությունները ծանրացնում է նման իրավաբանական տերմիններով, որպեսզի տպավորություն ստեղծի, որ լավ է հասկանում ուկրաինական իրավունքն ու հեղինակավոր փորձագետ է։
Այդ լեզվի օգտագործումը, հավանաբար, նաեւ նպատակ ունի ստիպել հավատալ Պուտինի կեղծ հայտարարություններին՝ առանց փաստերը ստուգելու։ Սակայն Ուկրաինայի Սահմանադրությունը եւ ռազմական դրության մասին օրենքը այնքան էլ անթափանցիկ չեն, որպեսզի սովորական ընթերցողը չկարողանա հասկանալ դրանք։
Փաստը, որ կրեմլյան պաշտոնյաները վերջին ժամանակներս մանրամասն քարոզում են այս նարատիվները արտասահմանյան երկրներում տեղի ունեցող միջոցառումներում եւ խոշոր արեւմտյան պարբերականներում, վկայում է այն մասին, որ Կրեմլի այդ տեղեկատվական գործողությունը զգալի չափով ուղղված է արեւմտյան լսարանին, ամփոփել են փորձագետները։