Պուտինն ապավինում է Ալիևի «մեծահոգությանը»

Երևանն իրականում չի ցանկանում տեսնել Լեռնային Ղարաբաղի նախկին ղեկավարներին.  «Վալդայ» միջազգային քննարկումների ակումբի լիագումար նիստի ժամանակ հայտարարել է ՌԴ նախագահ Վլադիմիր Պուտինը՝ պատասխանելով հարցին, թե Ռուսաստանը կարո՞ղ է Բաքվին կոչ անել ազատ արձակել  Լեռնային Ղարաբաղի նախկին ղեկավարներին, այդ թվում՝ նախկին պետնախարար Ռուբեն Վարդանյանին։

 «Դե, նա հրաժարվեց մեր քաղաքացիությունից»,- նշել է Պուտինը։

«Ես հեռախոսով խոսեցի նախագահ Ալիևի հետ,  նա ինձ վստահեցրեց, որ ինչ էլ լինի, ինքը կապահովի Լեռնային Ղարաբաղի հայ բնակչության անվտանգությունն ու իրավունքները։

Բայց հիմա այնտեղ հայ չի մնացել, բոլորը գնացել են։ Այնտեղ պարզապես հայեր չկան։ Դե, միգուցե 1000-1500:

Իսկ ինչ վերաբերում է նախկին ղեկավարներին, չգիտեմ, չեմ ուզում մանրամասնել, բայց ինչպես հասկացա, նրանց իրականում Երևանում չեն ուզում տեսնել։ Բայց ես կարծում եմ՝  Ադրբեջանի ղեկավարությունը  մարդասիրական  նկատառումներից ելնելով հաշվի կառնի այն հանգամանքը, որ Ադրբեջանի տարածքային բոլոր հարցերը լուծված են»,- նշել է Վլադիմիր Պուտինը։