Պուտինն Ուկրաինայում հրադադարի հաստատման հիմնական խոչընդոտն է. Քելլոգ

Ուկրաինան համաձայնել է Ռուսաստանի հետ համապարփակ զինադադարի, որն առաջարկել էր ամերիկյան կողմը։ Այժմ զինադադարի հիմնական խոչընդոտը ՌԴ նախագահ Վլադիմիր Պուտինն է։ Այս մասին Fox News հեռուստաալիքին ասել է ԱՄՆ նախագահի՝ Ուկրաինայի հարցով հատուկ ներկայացուցիչ Քիթ Քելլոգը։

«Նրանք (ուկրաինացիները) համաձայնել են, որ անհրաժեշտ է համապարփակ զինադադար՝ ցամաքում, ծովում և երկնքում, 30 օրով, որը կարող է երկարաձգվել: Նրանք այսօր դա են ուզում։ Երկու շաբաթ առաջ վերադարձել ենք Լոնդոնից, որտեղ բանակցել ենք վճռական տրամադրված երկրների կոալիցիայի հետ՝ բրիտանացիների, ֆրանսիացիների և գերմանացիների գլխավորությամբ: Նրանք պատրաստ են այս համապարփակ զինադադարին՝ բազմաթիվ պայմաններով։ Եվ ուկրաինացիները համաձայն են դրան»,- ասել է Քելլոգը:

Նա հավելել է, որ Ուկրաինային դուր չեն գալիս բոլոր պայմանները, սակայն իրենք «գալիս են այն եզրակացության, որ դա այն ճանապարհն է, որով պետք է առաջ շարժվել»։ ԱՄՆ նախագահի հատուկ ներկայացուցիչը կարծում է, որ կողմերը «մոտ են» հնարավոր հրադադարին։

«Կարծում եմ, որ մենք մոտ ենք: Միակ մարդը, ով կարող է դա անել, նախագահ Թրամփն է: Բայց եթե Պուտինը համաձայնի: Կարծում եմ, հենց հիմա, մեր ամենամեծ խոչընդոտը առաջընթացի համար Ռուսաստանի նախագահն է, որը համաձայն չէ», - ասել է Քելլոգը:

Հիշեցնենք, որ մարտին Սաուդյան Արաբիայում ամերիկյան թիմն Ուկրաինային առաջարկել էր 30 օրով համապարփակ զինադադար։ Ուկրաինան համաձայնել է ԱՄՆ-ի առաջարկին, սակայն դեռ սպասում է Ռուսաստանի պատասխանին։

Կրեմլը 30-օրյա հրադադարի փոխարեն հրադադար էր հայտարարել Սուրբ Զատկի տոնին, ինչպես նաև եռօրյա հրադադար՝ Մայիսի 9-ի Կապակցությամբ։

www.tert.am

Լրահոս