ՌԴ-ն աջակցում է Հայաստանին «Թրամփի ուղի» անվամբ տրանսպորտային միջանցք ստեղծելու հարցում. Օվերչուկ

Ռուսաստանն աջակցում է Հայաստանին Ադրբեջանի հետ «Թրամփի ուղի» անվամբ տրանսպորտային միջանցք ստեղծելու ծրագրերում, եթե Երևանը դա անհրաժեշտ է համարում, լրագրողներին, ՏԱՍՍ-ի փոխանցմամբ, հայտարարել է Ռուսաստանի փոխվարչապետ Ալեքսեյ Օվերչուկը։

«Մենք այս հարցը քննարկում ենք հետևյալ հարթության վրա։ Հայաստանը մեր ռազմավարական դաշնակիցն է, և եթե Հայաստանը կարծում է, որ իր համար ինչ-որ բան լավ է, ապա, իհարկե, մենք այստեղ աջակցում ենք Հայաստանին: Եթե նրանք կարծում են, որ Վաշինգտոնում համապատասխան հռչակագրի ստորագրումը ապահովում է ավելի մեծ անվտանգության երաշխիքներ, ապա դա լավ է, քանի որ մենք նույնպես աջակցում ենք Հարավային Կովկասում խաղաղության գործընթացներին», - ասել է նա՝ պատասխանելով համապատասխան հարցին։

Նրա խոսքով՝ սա «ամբողջությամբ և միանգամայն համապատասխանում է» Ռուսաստանի Դաշնության շահերին։

Օգոստոսի 8-ին, ԱՄՆ նախագահ Դոնալդ Թրամփի հետ Վաշինգտոնում եռակողմ հանդիպումից հետո, Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը ստորագրել են համատեղ հռչակագիր Երևանի և Բաքվի միջև խաղաղ կարգավորման և հանրապետությունների միջև տրանսպորտային ուղու ստեղծման վերաբերյալ։

Ուղին կկոչվի «Թրամփի ուղի՝ միջազգային խաղաղության և բարգավաճման համար»։

www.tert.am

Լրահոս