Ռուսաստանի Դաշնության Պատվո շքանշան՝ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին

Հունվարի 10-ին Մայր Աթոռ Սուրբ Էջմիածնում Ամենայն Հայոց Կաթողիկոսին կհանձնվի  ՌԴ Պատվո շքանշան։ Վեհափառ Հայրապետը պետական պարգևին արժանացել է Ռուսաստանի Դաշնության Նախագահ Վլադիմիր Պուտինի հրամանագրով՝ «Ռուսաստանի եւ Հայաստանի միջև մշակութային-հումանիտար կապերի զարգացման գործում ունեցած մեծ ավանդի համար»։ 

Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին շքանշանը կհանձնի Հայաստանի Հանրապետությունում Ռուսաստանի Դաշնության դեսպան Սերգեյ Կոպիրիկինը։ 

Ռուսաստանի Դաշնության «Պատվո շքանշան»-ը հիմնադրվել է 1994 թվականին և շնորհվում է ինչպես երկրի քաղաքացիներին՝ ամենատարբեր ոլորտներում արդյունավետ գործունեության համար, այնպես էլ օտարերկրյա քաղաքացիներին՝ երկու երկրների միջև բարեկամական հարաբերությունների զարգացման գործում ունեցած մեծ ավանդի համար։ 

Հավելենք, որ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, ի թիվս բազմաթիվ շքանշանների, արժանացել է Հորդանանի բարձրագույն Ա կարգի շքանշանի, Պաղեստինի «Բեթղեհեմ-2000» շքանշանի, Ռումինիայի ազգային բարձրագույն պարգևի՝ «Ռումինիայի աստղ» շքանշանի, Ուկրաինայի Հանրապետության «Իշխան Յարոսլավ Իմաստուն» 5-րդ աստիճանի շքանշանի,  Ֆրանսիայի Պատվավոր Լեգեոնի շքանշանի, Ռուս Ուղղափառ եկեղեցու «Սուրբ Անդրեաս առաքյալ», Ռուսաստանի Դաշնության Բարեկամության շքանշանի, Հայաստանի Հանրապետության «Սուրբ Մեսրոպ Մաշտոց» շքանշանի և «Պատվո շքանշան»-ի։

Հայաստանի Թեքեյան մշակութային միության լրատվական կենտրոն