Ռուսաստանի հետախուզական ծառայություններն ակտիվացրել են իրենց դիվերսիոն արշավը Եվրոպայում

Ռուսաստանի հետախուզական ծառայությունները վերջերս սկսել են ակտիվանալ Եվրոպայում փոքր դիվերսիոն գործողություններ իրականացնելու հարցում, ինչպիսիք են հրկիզումները կամ հրկիզման փորձերը, գրում է The New York Times-ը՝ հղում անելով ամերիկյան հետախուզության աղբյուրներին։

Թեև նման միջադեպերը պատահական են թվում, դրանք ուղղված են Ուկրաինային աջակցելու համար Եվրոպայում իբր աճող դժգոհության պատրանք ստեղծելուն և նպատակ ունեն խոչընդոտներ ստեղծել ուկրաինացի զինվորականներին զենք մատակարարելու գործում, կարծում են պարբերականի զրուցակիցները։

Որպես այդպիսի դիվերսիաների օրինակ են բերվում Մեծ Բրիտանիայում պահեստի, Լեհաստանում ներկերի գործարանի, Լատվիայում գտնվող շենքի և Լիտվայում IKEA խանութի հրկիզումները: Եվրոպական և ամերիկյան հետախուզական ծառայությունները, գրում է NYT-ը, կարծում են, որ խոսքը համակարգված արշավի մասին է, որի հետևում կանգնած է Ռուսաստանի հետախուզության գլխավոր վարչությունը:

Նման դիվերսիաները, ըստ պարբերականի աղբյուրների, կարող են, ի թիվս այլ բաների, նպատակ ունենալ ստիպել եվրոպական երկրներին բարձրացնել սպառազինությունների մատակարարման ողջ շղթայի անվտանգությունը՝ դրանով իսկ ավելացնելով ծախսերը և դանդաղեցնել Ուկրաինային ռազմական օգնություն տրամադրելու տեմպերը։

Դիվերսիոն հարձակումների թվի աճը, որոնց հետևում, ենթադրաբար, կանգնած են ռուսական հետախուզական ծառայությունները, գրում է NYT-ը, կքննարկվի ԱՄՆ Ազգային հետախուզության ղեկավարի հետ ՆԱՏՕ-ի անդամ երկրների ներկայացուցիչների հանդիպմանը, որը նախատեսված է հունիսին։

Լրահոս