Ռուսաստանում այսօր սգո օր է

Մարտի 24-ին Ռուսաստանում համազգային սգո օր է ի հիշատակ մերձմոսկովյան Crocus City Hall համալիրում տեղի ունեցած ահաբեկչության հետևանքով զոհվածների. գրում է ՌԻԱ «Նովոստի»-ն:

Մարտի 24-ը սգո օր հայտարարելու որոշումը ռուսաստանցիներին հատուկ ուղերձով երեկ հայտնել էր ՌԴ նախագահ Վլադիմիր Պուտինը։ Նա Մոսկվայի մարզում տեղի ունեցածն անվանել է «արյունալի, բարբարոսական ահաբեկչություն» և խոստացել, որ հանցագործության մեղավորները, կազմակերպիչները և պատվիրատուները կստանան արդար և անխուսափելի պատիժ:

Ռուսաստանում սգո օր հայտարարելու իրավունք ունի միայն նախագահը։ Այս օրը ազգային դրոշներն իջեցված են, իսկ մշակութային հաստատություններին խորհուրդ է տրվում չեղարկել ժամանցային միջոցառումները։ Հեռուստաալիքները հրաժարվում են գովազդային և ժամանցային հաղորդումներից։
Հիշեցնենք, որ մարտի 22-ի երեկոյան մի խումբ զինված տղամարդիկ ինքնաձիգներից կրակ են բացել Մոսկվայի Crocus City Hall-ում, ինչից հետո տեղում պայթյուն է տեղի ունեցել և հրդեհ է բռնկվել: Հաղորդվում է առնվազն 133 զոհի և152 վիրավորի մասին:

Լրահոս