Ռուսները զմայլված են Ադրեբաջանի ընտրություններով

Այս ընտրություններում ադրբեջանական ժողովուրդը համերաշխություն դրսևորեց, ինչպես հաղորդում է ադրբեջանական APA-ն, այս մասին հայտարարել է ՌԴ Պետդումայի պատգամավոր Ալեքսեյ Ժուրավլևը՝ խոսելով Ադրբեջանում արտահերթ նախագահական ընտրությունների մասին։

Նա նշել է, որ ընտրություններն անցել են շատ թափանցիկ. «100 տոկոսով այդպես է եղել։ Միայն կողմնակալ մարդիկ կարող են հակառակն ասել։ Ժամանակն է անցնել խաղաղ աշխատանքի։ Շատ բան կա անելու։ Ես ծանոթացա օկուպացիայի ժամանակ Ադրբեջանին հասցված վնասներին, շատ ափսոսեցի, սարսափեցի։ Քանի տուն, դպրոց, մշակութային օջախ ավերվեց. Այժմ դրանք պետք է վերականգնվեն։ Այս գործում Ռուսաստանը Ադրբեջանի կողքին է։ Շնորհավորում եմ Իլհամ Ալիևին նախագահի պաշտոնում վերընտրվելու կապակցությամբ»։

Ռուսաստանի Դաշնության Պետդումայի միջազգային հարաբերությունների հանձնաժողովի փոխնախագահ Ալեքսեյ Չեպան ասել է, որ ընտրություններն անցել են շատ բարձր մակարդակով. «Երեկվա ընտրությունները տարբերվում էին մի շարք երկրներում անցկացված ընտրություններից։ Կարգապահությունը շատ լավն էր։ Նկատեցի, որ երիտասարդները շատ ակտիվ էին ընտրություններում։ Այլ երկրներում երիտասարդներն այդքան էլ ակտիվ չեն մասնակցում ընտրություններին։ Երեկ մենք հնարավորություն ունեցանք շփվելու ընտրողների հետ։ Ես հասկացա, որ երիտասարդները քվեարկել են հանուն իրենց ապագայի, իրենց զարգացման համար։ Ադրբեջանի ժողովուրդն իր կամքն արտահայտեց ընտրություններում. Աշխարհը փոխվել է, և ոչ ոք չի կարող ազդել Ադրբեջանի վրա։ Մեծ հաճույքով շնորհավորում եմ Իլհամ Ալիևին»։

Ադրբեջան-Ռուսաստան բարեկամության խմբի անդամ, պատգամավոր Ալեքսանդր Յուշչենկոն նույնպես ասաց, որ չի նկատել խախտումներ, որոնք կարող են ազդել ընտրությունների արդյունքների վրա. «Մարդիկ ուրախությամբ էին եկել ընտրությունների։ Ընտրությունները եղել են բացարձակ թափանցիկ ու արդար»։

20 տարի Ադրբեջանը ղեկավարած Իլհամը կշարունակի բռնապետ լինել ևս 7 տարի։ Նա մտավ 5-րդ շրջանի մեջ, 5-րդ անգամ «ընտրվեց» նախագահ։ Ադրբեջանի ԿԸՀ–ն ամփոփել է ընտրությունների արդյունքը, ըստ որի՝ Ալիևը ստացել է ձայների 92,5%-ը:

Լրահոս