«Սարդը» գնո՞ւմ է, թե՞ պարզապես տեղափոխվում. ի՞նչ է սպասվում Երևանի սիրված քանդակին․ Լուսանկարներ

Երևանում տեղադրված յուրաքանչյուր քանդակ իր շուրջ ձևավորում է պատմություն, հաղորդում մթնոլորտ ու երբեմն դառնում քաղաքի դեմքի մի մասը։ Այդպիսին էր նաև «Սարդը»՝ քանդակագործ, ՀՀ վաստակավոր նկարիչ Արա Ալեքյանի աշխատանքը, որը տարիներ շարունակ իր տեղն էր գտել «Մոսկվա» կինոթատրոնի դիմաց՝ Շառլ Ազնավուրի անվան հրապարակում։

«Սարդը» վաղուց էր դարձել ոչ միայն արվեստի գործ, այլև սիրված վայր երևանցիների, զբոսաշրջիկների ու երեխաների համար։ Սակայն Ազնավուրի հուշարձանի տեղադրմամբ՝ հրապարակը ենթարկվեց փոփոխության, և որոշվեց, որ «Սարդը» պետք է հեռանա։

Ի՞նչ ճակատագիր է սպասում քանդակին, կլքի՞ արդյոք Հայաստանը, թե՞ պարզապես նոր «ցանց» կգծի քաղաքի մեկ այլ հատվածում։ Aysor.am-ի հետ զրույցում այս հարցերին պատասխանել է քանդակի հեղինակը՝ Արա Ալեքյանը։

«Երբ որոշվել էր, որ «Մոսկվա» կինոթատրոնի բակում պետք է Շառլ Ազնավուրի արձանը տեղադրվի, արդեն ներկայացվել էր, որ «Սարդը» պետք է այդտեղից հանվի»,- ասաց Արա Ալեքյանը։

Նրա խոսքով՝ սկզբում իրեն տեղեկացրել էին, որ Ազնավուրի արձանի բացումը նախատեսված է 2024 թվականի հոկտեմբերին։ Իսկ Ալեքյանը, սովորաբար, հունվար-սեպտեմբեր ամիսներին մեկնում է ԱՄՆ՝ երեխաների մոտ, սեպտեմբերին վերադառնում.

«Դե հույս ունեի, որ բավարար ժամանակ կունենամ «Սարդը» պատշաճ կերպով տեղափոխելու համար։ Բայց հոկտեմբերն էլ, նոյեմբերն էլ անցան, բացումը չեղավ։ Իսկ «Սարդը» ես պետք է տեղափոխեի, որ չվնասվեր»։

Մի քանի շաբաթ առաջ քանդակագործին զանգահարել է Երևանի քաղաքապետարանի մշակույթի բաժնի պետը՝ տեղեկացնելով, որ «Սարդը» պետք է հեռացվի Ազնավուրի անվան հրապարակից՝ շանսոնյեի հուշարձանը տեղադրելու նպատակով։

«Ասաց, թե ուզում են տեղափոխել Հյուսիսային պողոտա։ Ասաց նաև, որ ճիշտ կլինի՝ ես էլ նայեմ, թե որտեղ կուզեի տեղափոխվեր «Սարդը»։ Ասել եմ՝ խնդիր չկա, բայց քանի որ երկրում չեմ, ընկերներիս կխնդրեմ օգնել տեղաշարժման հարցում, որպեսզի քանդակը չվնասվի։ Այդպես էլ եղավ։ Տեղափոխել են Նկարիչների միության մոտ։ Մնում է՝ ես գամ, արդեն որոշենք, թե ուր ենք տեղափոխում «Սարդին»»։

Հարցին՝ արդյոք համակերպվա՞ծ է քանդակագործն այն փաստի հետ, որ քանդակը այլևս կենտրոնում չի լինելու՝ Արա Ալեքյանը պատասխանեց՝ խնդիր չի տեսնում։

«Իհարկե, բարդ է տեղափոխելը, բայց ինձ համար՝ ոչ։ Քանի որ ես եմ հավաքել «Սարդը», գիտեմ, թե որտեղից պետք է կտրեմ, ոնց հավաքեմ, որ այն չվնասվի։ Պարզապես պետք է այնպիսի տեղում տեղադրվի, որ մարդկանց էլ վնաս չտա, մարդկանց հոսք կա այդտեղ, չկպնեն՝ վնասեն իրենց»։

Նա նշեց՝ իրեն վատ չի զգում, որովհետև պատրաստ էր նման տարբերակի։ Ինչ վերաբերում է Շառլ Ազնավուրի արձանին՝ այն դեռ չի տեսել։

«Տարբեր կարծիքներ լսել եմ, կարդացել, բայց քանի դեռ չեմ տեսել, ոչինչ չեմ կարող ասել»։