Շվեդիայի գիտնականները մոտ 5500 տարվա վաղեմության դամբարան են հայտնաբերել

Շվեդիայում դամբարաններ ուսումնասիրող հետազոտողները սկզբում տարակուսել են այն փաստից, որ գտել են Սկանդինավիայում երբևէ հայտնաբերված ամենահին քարե «դոլմեններից» մեկը, սակայն հետո նրանց ուշադրությունը գրավել է մեկ այլ հանգամանք՝ գերեզմաններում գանգեր և ազդրոսկրեր չեն եղել, գրում է Popular Mechanics-ը։

«Հնարավոր է՝ դրանք դուրս են բերվել գերեզմաններից։ Չգիտենք՝ դա կապված է թաղման ծեսերի հետ, թե դրա հետևում այլ բան կա թաքնված», - ասել է հնագետ Կարլ-Գորան Սյոգրեն:

Գիտնականները կարծում են, որ Շվեդիայի Տիարփի դամբարանը, որը թվագրվում է վաղ նեոլիթյան ժամանակաշրջանին՝ մոտավորապես մ.թ.ա. 3500 թվականին, անձեռնմխելի է մնացել քարե դարից ի վեր, բայց այդ ընթացքում ինչ-որ մի բան է պատահել գանգերի հետ։ Դամբարանում եղել են ձեռքերի և ոտքերի բազմաթիվ ոսկորներ, կողոսկրերի մնացորդներ և օրգանական ավելի փոքր տարրեր, ինչպիսիք են ատամները, սակայն ավելի մեծ ոսկորներն ավելի քիչ են եղել։

Հայտնագործության վերաբերյալ «Neolithic Archaeology»-ում հրապարակված ուսումնասիրությունում նշվում է, որ ըստ Գյոթեբորգի և Քիլի համալսարանների հետազոտական թիմի՝ «ծիսական արարողակարգերը» կարող են դեր խաղացալ լինել այս հարցում։

Ոսկորների փորձարկումը ցույց է տվել, որ առկա են առնվազն մեկ տասնյակ մարդկանց մնացորդներ՝ նորածիններից մինչև տարեցներ: Այդուհանդերձ, չկան հիմքեր եզրակացնելու, որ նրանք մահացել են գլխատման հետևանքով:

Տիարփում հայտնաբերված դամբարանը եզակի է։ Նախ, այն հավանաբար 200 տարով ավելի հին է, քան այդ տարածքում հայտնաբերված մյուս դամբարանները, ինչն այն դարձնում է ամբողջ Սկանդինավիայի ամենահին դամբարաններից մեկը:

Հավանականություն կա, որ Տիարփի դոլմենում թաղված մարդիկ ֆերմերներ են եղել, սակայն հետազոտական թիմը լրացուցիչ տեղեկություններ է ցանկանում ստանալ։ Նրանք նախատեսում են ուսումնասիրել առկա ԴՆԹ նմուշները՝ կմախքի մնացորդների մասին ավելին իմանալու համար։

Լրահոս