«Սրբազան շարժման» հանրահավաքի մասնակիցները երթով շարժվեցին դեպի Սահմանադրական դատարան

Հանրապետության հրապարակում հոկտեմբերի 6-ին տեղի ունեցավ «Սրբազան շարժման» հերթական հանրահավաքը:

Շարժման առաջնորդ Բագրատ արքեպիսկոպոս Գալստանյանն իր ելույթում քննադատեց Սահմանադրական դատարանի որոշումը 2024 թվականի օգոստոսի 30-ին ստորագրված «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգում ամրագրված պարտավորությունների՝ Սահմանադրությանը համապատասխանության հարցի վերաբերյալ:

Նա Սահմանադրական դատարանի որոշումը բնորոշեց որպես ական պետականության հիմքում՝ հավաքի մասնակիցներին կոչ արեց երթով շարժվել դեպի Սահմանադրական դատարանի շենք:

«Սա մեր խաղաղ բողոքի, անհնազանդության և ընդվզումի արտահայտությունը պետք է լինի»,-շեշտեց Գալստանյանը:

Չնայած նրա հայտարարությանը, որ հավաքի մասնակիցներից շատերը դեմքերով ու անուններով չեն ճանաչում Սահմանադրական դատարանի դատավորներին, որոնք «ճակատագրական որոշումներ են կայացնում ժողովրդի համար», սակայն երթի առջևից շարժման մի խումբ աջակիցներ տանում էին դատավորների մեծադիր լուսանկարները՝ նրանց անուններով:

Բագրատ արքեպիսկոպոս Գալստանյանը հայտարարեց, որ շարժման հետագա գործողությունների մասին առավել մանրամասն կհայտնի արդեն Սահմանադրական դատարանի շենքի մոտ, իսկ մինչ այդ նշեց, որ առաջիկա չորեքշաբթի կեսօրին կարևոր հանդիպման է հրավիրում աջակիցներին:

Տեղեկատվությունը՝ www.armenpress.am

Լրահոս