«Թատրոն 8»-ը Ֆեոդոր Դոստոևսկու պատմվածքներից մեկի հիման վրա բեմադրված ներկայացումը կցուցադրի Երևանի տիկնիկային թատրոնում

«Թատրոն 8»-ը Ֆեոդոր Դոստոևսկու «Խոնարհը» պատմվածքի համանուն ներկայացմամբ հանդես կգա Երևանի Հովհաննես Թումանյանի անվան պետական տիկնիկային թատրոնում։

Հանդիսատեսը ներկայացումը դիտելու հնարավորություն կունենա մայիսի 30-ին։

Ներկայացումը դասական տեքստի ժամանակակից թատերական մեկնաբանություն է, որը բացահայտում է մարդկային հոգեբանության խորը շերտերը և հուզում է գաղափարական, էմոցիոնալ լիցքերով։

Ռեժիսորը Վլադիմիր Տառասյանցն է, դերերում՝ Մխիթար Ավետիսյան, Ժաննա Հովակիմյան։ Ներկայացումը ռուսերեն է։

««Խոնարհը» մի մարդու ներքին խոսքն է՝ խոստովանություն, որում լսվում է մեղքի, կորստի, լռության ճիչը։ Նա փորձում է հասկանալ՝ ինչու չկարողացավ փրկել, ինչու չտեսավ, չլսեց, չհասկացավ…

Բայց արդյոք երբեմն մեր հպարտությունը չի՞ լինում կործանարար, արդյոք մենք ինքնե՞րս չենք ստեղծում այն լռությունը, որը վերջնականապես խզում է մարդկային կապերը։ Սա պատմություն է մենության, սիրելու անկարողության, երբեմն՝ ինքներս մեզ փրկելու մոլուցքի մասին, երբ այդ մյուսը դառնում է գործիք, զոհաբերություն։ Ներկայացումը բարձրացնում է բարու և չարի սահմանների, կյանքի անխուսափելի հանգամանքների, վրեժի տենչի, սեփական «ես»-ի ու հանրության փխրուն հավասարակշռության մասին հարցեր՝ հրավիրելով դիտողին ներքին երկխոսության»,-ասվում է ներկայացման մասին պատմող հաղորդագրության տեքստում։

Բեմադրությունը մինիմալիստական է՝ կենտրոնացած կերպարների հոգեկան մերկության, ներքին լարման և հուզական լռության վրա։

Ռեժիսոր Վլադիմիր Տառասյանցը նշում է.

«Մեր արտահայտությունների խտությունը երկարատև աշխատանքի արդյունք է։ Երբ խորն ես սուզվում, ճնշումն աճում է, և դժվար է տարբերել սովորականը։ Երբ վեր ես բարձրանում, վերադառնում ես հարստացած փորձով։ Մենք հրավիրում ենք հանդիսատեսին մեզ հետ անցնելու այս ինքնաճանաչման ուղին։ Այն ամենը, ինչ անում ենք, միայն հանդիսատեսի համար է։ Եթե խաղում ես ազնվորեն, սիրում ես հանդիսատեսին, ապա սիրված կլինես»։

«Թատրոն 8»-ը անկախ թատերախումբ է, որը ստեղծում է հեղինակային և փորձարարական բեմադրություններ՝ կենտրոնանալով ժամանակակից հոգեբանական և սոցիալական թեմաների վրա։ Թիմը հավատում է, որ բեմը տարածք է, որտեղ կարելի է ապրել, մտածել, ցավել և փնտրել պատասխաններ։ «Խոնարհը» այդ որոնման հերթական փուլն է։

www.armenpress.am

Լրահոս