Զեղչված գրքեր, հանդիպումներ գրողների հետ, նվեր քարտեր. մեկնարկում է «Գրքի գիշեր» նախագիծը

Հայաստանում բոլոր գրքասերներին սպասվում է հետաքրքիր ծրագիր։ «Բուկինիստ» ընկերությունը նոյեմբերի 7-ին հանդես է գալու «Գրքի գիշեր» նախագծով, որը հնարավորություն է տալու սիրված գրքերը ձեռք բերել համեմատաբար ավելի ցածր գնով։ Ինչպես ամեն տարի, այս անգամ ևս «Բուկինիստ»-ի բոլոր մասնաճյուղերում և books.am կայքում ընթերցողներին սպասվում են անակնկալներ, նվերներ և արդեն ավանդույթ դարձած 30% զեղչ ամբողջ տեսականու համար։

«Արմենպրես»-ի մամուլի սրահում հրավիրված ասուլիսում «Բուկինիստ» ընկերության տնօրեն Խաչիկ Վարդանյանը նշեց, որ «Գրքի գիշեր»-ը գրքասերների շրջանում արդեն դարձել է սպասված միջոցառում։

«Դեռ տարեսկզբից շատ հարցումներ ենք ստանում այն մասին, թե երբ է անցկացվելու «Գրքի գիշեր» նախագիծը։ Այդ օրը բոլոր գրքասերները կարող են գնել իրենց սիրելի գրքերը զեղչված գնով ։ Մեր բոլոր խանութները աշխատելու են մինչև կեսգիշեր, իսկ խոշոր առևտրի կենտրոններում գտնվող մեր մասնաճյուղերը՝ մինչև 22։00-ն։ Սիրով բոլորին կսպասենք»,-ասաց Խաչիկ Վարդանյանը։

Անակնկալները չեն սահմանափակվում այսքանով։ Կլինեն կոնկրետ ժամեր, երբ գնումներ կատարելիս կգործի 40 տոկոս զեղչ մի շարք գրքերի պարագայում։ Մասնավորապես, ժամը 19։00-20։00-ի ընթացքում 40 տոկոս զեղչով հնարավոր կլինի ձեռք բերել «Բուկինիստ» հրատարակչության հանրագիտարանները, ժամը 20։00-21։00-ի ընթացքում Աշոտ Աղաբաբյանի 4 գրքերից որևէ մեկը գնելիս՝ կգործի նույնքան զեղչ, և 21։00-22։00-ն ընկած ժամանակահատվածում նույնքանով զեղչվելու են Մարկ Արենի գրքերից մի քանիսը։ «Բուկինիստ» ընկերության PR մենեջեր Անի Ավանեսովան տեղեկացրեց՝ նոյեմբերի 7-ին գնումներ կատարողները կստանան նվեր քարտ, որով մինչև դեկտեմբերի 7-ը գնումներ կատարելիս՝ կունենան հավելյալ զեղչեր։

«Այն անձինք, որոնք նոյեմբերի 7-ին ինչ-ինչ պատճառով չեն կարողանա այցելել գրախանութներ, հնարավորություն կունենան նույն 30 տոկոս զեղչով գրքերը գնել օնլայն տարբերակով»,-ասաց Անի Ավանեսովան։

«Գրքի գիշեր» նախագիծը ոչ միայն զեղչային տարբերակով գրքեր գնելու, այլև գրողների, հանրային դեմքերի հետ շփվելու հնարավորություն է։ Մաշտոցի պողոտայի «Բուկինիստ»-ի գլխավոր գրախանութում կհայտնվի հատուկ անկյուն՝ Եգոր Գլումովի, Սյունե Սևադայի և Լիաննա Պուլուզյանի (Bookiinny) կողմից ընտրված գրքերով։ Գրքերի վերնագրերը կմնան գաղտնի․տեսանելի կլինի միայն խորհրդատուի անունը։

www.armenpress.am

Լրահոս