Զելենսկին ակնարկել է, որ աջակցում է ԱՄՆ-ի կողմից Իրանի դեմ հարվածներին

Իրանն աջակցում է Ռուսաստանին Ուկրաինայում, սա պետք է դադարեցվի․ հայտարարել է Ուկրաինայի առաջնորդ Վլադիմիր Զելենսկին՝ ԱՄՆ-ի կողմից Իրանին հարվածներից հետո, հաղորդում է ուկրաինական «Ստրանա» հրատարակությունը։

«Մենք բոլորս շատ լավ հիշում ենք, թե որտեղից է Ռուսաստանը ձեռք բերում նման զենք։ Ռուսաստանին աջակցելու Իրանի որոշումները մեր երկրին և շատ այլ երկրների բերել են լայնածավալ ավերածություններ, հսկայական մարդկային կորուստներ։ Եվ սա, իսկապես, պետք է դադարեցվի», - նշել է նա։

Զելենսկին նաև դեմ է արտահայտվել միջուկային զենքի տարածմանը, որը, ըստ նրա, «չպետք է գոյություն ունենա ժամանակակից աշխարհում»։

Հունիսի 22-ի գիշերը ԱՄՆ նախագահ Դոնալդ Թրամփը հայտարարեց, որ ԱՄՆ ռազմաօդային ուժերը հարձակվել են Իրանի երեք միջուկային օբյեկտների վրա։ Հիմնական թիրախը Ֆորդոուն էր՝ ուրանի հարստացման գործարանը։ Դրա ցենտրիֆուգներով դահլիճը ծածկված է հարյուր մետրանոց ժայռով և երկաթբետոնե շերտով, ինչը այն գործնականում անխոցելի է դարձրել ռմբակոծության համար։

www.aysor.am

Լրահոս