ԱՄՆ-ը դադարեցրել է մեկ ցենտանոց մետաղադրամների հատումը. դրանք թողարկվել են ավելի քան 200 տարի

ԱՄՆ Ֆինանսների նախարարությունը պաշտոնապես դադարեցրել է մեկ ցենտանոց մետաղադրամների թողարկումը։ Նոյեմբերի 12-ին Ֆիլադելֆիայի դրամահատարանում հատվել է վերջին պեննին՝ ԱՄՆ գանձապահ Բրենդոն Բիչի հսկողության ներքո, հայտնում է CNN-ը։ Իշխանությունները հայտարարել են, որ վերջին հատված օրինակները կվաճառեն աճուրդով։

2025 թվականի փետրվարին ԱՄՆ նախագահ Դոնալդ Թրամփը հրամայեց դադարեցնել մեկ ցենտանոց մետաղադրամների հատումը՝ վկայակոչելով դրանց անշահավետությունը։

Ըստ ԱՄՆ Դրամահատարանի տվյալների՝ 2024 թվականին մեկ ցենտի պատրաստումն ու բաշխումն արժեցել է մոտ 3,7 ցենտ։ Վերջին տարիներին պեննիի հատումը թանկացել է ավելի քան երկու անգամ՝ մետաղադրամների արտադրության մեջ օգտագործվող պղնձի գնի աճի պատճառով։

Պեննին ինքը չի հանվի շրջանառությունից։ Ներկայումս Միացյալ Նահանգներում շրջանառության մեջ մոտ 300 միլիարդ պեննի կա։

Մեկ ցենտանոց մետաղադրամների արտադրությունը Միացյալ Նահանգներում սկսվել է 1793 թվականին՝ Ֆիլադելֆիայի դրամահատարանի հիմնադրմամբ, չնայած պեննիները առաջին անգամ հատվել են դրանից վեց տարի առաջ։

Պեննին ամերիկյան միակ մետաղադրամը չէ, որի հատումն արժե ավելի, քան դրա անվանական արժեքը։ ԱՄՆ Դրամահատարանի տվյալներով՝ 2024 թվականին հինգ ցենտ անվանական արժեքով յուրաքանչյուր մետաղադրամի պատրաստման և բաշխման վրա ծախսվել է մոտ 14 ցենտ։

Անցյալում ԱՄՆ-ն արդեն հրաժարվել է ցածր անվանական արժեքով մետաղադրամների հատումից, այդ թվում՝ պղնձի գնի աճի պատճառով։ ԱՄՆ Կոնգրեսը 1857 թվականին հրաժարվել է կես ցենտանոց անպահանջ մետաղադրամի թողարկումից, ինչպես նաև փոքրացրել է մեկ ցենտանոց մետաղադրամի չափը՝ օգտագործվող պղնձի քանակը կրճատելու համար։

www.news.am

Лента