Բատիկ աշխատանքների ցուցադրություն՝ «Մետաքսե գարուն» (տեսանյութ)

Հայաստանի Թեքեյան մշակութային միության նախաձեռնությամբ բացվեց «Մետաքսե գարուն» խորագրով բատիկ աշխատանքների ցուցահանդես։

Ցուցադրության ներկայացվեց նկարիչ-ստեղծագործողներ Արմենուհի Սաղդասարյանի, Գոհար Մաճկալյանի և Թանիա Մազեճեանի շուրջ 50 բատիկ աշխատանք։ Դրանք ներկայացնում են հեղինակների ինքնատիպությունն ու թեմատիկ ուղղությունները՝ ազգային խորհրդանիշների գործածմամբ հայոց պատմություն և մշակույթ, հայկական տառարվեստ և մանրանկարչության առանձնահատկություններ՝ բատիկի նոր տեխնիկաների բացահայտմամբ և կիրառմամբ։

Հայաստանի Թեքեյան մշակութային միության նախագահ Ռուբեն Միրզախանյանը շնորհավորեց ստեղծագործողներին և կարևորեց ցուցադրության կազմակերպումը, ինչը թույլ կտա հայ արվեստասերներին ծանոթանալ բատիկի տեխնիկայով ստեղծագործող մերօրյա հեղինակներին։

«Ի դեմս այս հեղինակների՝ մենք տեսնում ենք այդ արվեստի արտահայտությունը Հայաստանում։ Օրինաչափ է, որ մետաքսանկարչությամբ զբաղվում են կանայք, քանի որ ամեն ինչ գեղեցիկ է իր բովանդակությամբ, էությամբ և արտահայտության ձևերով»,-նշեց Ռուբեն Միրզախանյանն ու հեղինակներին մաղթեց ստեղծագործական ձեռբերումներ և հաջողություններ։

Մայր Աթոռ Սուրբ Էջմիածնի թանգարանների տնօրեն Տեր Ասողիկ աբեղա Կարապետյանն իր օրհնության խոսքում կարևորեց Հայաստանի Թեքեյան մշակութային միության կազմակերպած ցուցադրությունները, որոնք վառ են պահում արվեստը, մշակույթը։

«Աստվածային օրհնությամբ է օժտված կինը՝ մարդ արարելու, իր միջոցով բարություն ու գեղեցկություն արտադրելու և փոխանցելու բոլորին․ այսօրվա ցուցահանդեսը ստեղծագործական շնորհի արտացոլանքն է տիկնոջ միջոցով։ Նորօրյա մեր պատմության մեջ մանրանկարչության  արվեստում և գեղանկարչության ոլորտում կանայք գերազանցում են տղամարդկանց, ինչը շատ ուրախալի է»,-նշեց Տեր Ասողիկ աբեղա Կարապետյանն ու մաղթեց, որ հեղինակներն արթուն պահեն իրենց ստեղծագործական շնորհը և արվեստի միջոցով առաջնորդեն գեղեցկության և բարության ճանապարհներով։

Արվեստաբան, արվեստագիտության թեկնածու Իվեթ Թաջարյանն այն կարծիքն է, որ յուրաքանչյուրի աշխատանքում հետաքրքիր պատգամներ կան։ Նա հաջողություններ մաղթեց նկարիչ-ստեղծագործողներին և հավելեց․ «Եթե Արմենուհի Սաղդասարյանի աշխատանքները կարծես լույսից դուրս եկած խորհրդանշական կոմպոզիցիաներ  են, երազանքների արտացոլանք, ապա Գոհար Մաճկալյանի մոտ՝ առարկայական, շոշափելի և իրականությունը ներկայացնող ստեղծագործությունն են, որոնցում  նա ներդաշնակորեն համադրել է իր և հայրենիքի ամուր կապը»,-նշեց արվեստաբանն ու անդրադառնալով Թանիա Մազեճեանի աշխատանքներին՝ հավելեց՝ նրա աշխատանքներում հեղինակի ապրումներն են՝ փնտրտուքներ, մտորումներ և ազատություն։

Գոհար Մաճկալյանը հեղինակների անունից շնորհակալություն հայտնեց ցուցադրության կազմակերպման համար և վստահեցրեց՝ շարունակելու են ստեղծագործել և արվեստասեր հանրությանը ներկայացնել մեզանում նոր, բայց արդեն սիրված դեկորատիվ արվեստի այս ուղղությունը՝ մետաքսանկարչությունը։

Նշենք, որ «Մետաքսե գարուն» խորագրով բատիկ աշխատանքների ցուցադրությունը «Թեքեյան» կենտրոնում բաց կլինի մինչև ապրիլի 7-ը։