Չի կարող Արցախի հարցը համարվել լուծված, եթե արցախցին զրկված է իր հայրենիքից, գերեզմաններից, սրբություններից. Շահրամանյան (Տեսանյութ)

Այսօր հարգանքի տուրք ենք մատուցում բոլոր մեր հայրենակիցների հիշատակին, ովքեր 5 տարի առաջ ընդունել են Ադրբեջանի հարվածը, որպեսզի մենք կարողանանք կանգնեցնել այդ հարձակումներն Արցախի նկատմամբ, «Եռաբլուրում» լրագրողների հետ զրույցում ասաց Արցախի նախագահ Սամվել Շահրամանյանը։

Հարցին՝ կարո՞ղ էինք խուսափել պատերազմից՝ պատասխանեց.«Տարիներ շարունակ ձևավորված է եղել Մինսկի խումբ, որը զբաղվում էր այդ հակամարտության կարգավորմամբ և տարիներ շարունակ լսում էինք, որ արցախի հարցը չունի ռազմական լուծման տարբերակ։ Ցավոք, թե՛ աշխարհում, թե՛ ամենուր փոխվել են տեսակետները, իրավիճակը։ Այսօր տեսնում ենք, որ աշխարհում շատ հարցեր լուծվում են ուժի տարբերակով։ Իսկ թե արդյոք կկարողանայի՞նք խուսափել պատերազմից՝ հիմա չեմ կարող ասել»։

Ինչպե՞ս է վերաբերվում, այսպես ասած, Ադրբեջանի հետ խաղաղության հաստատմանը։

«Մենք ողջունում ենք ցանկացած նախաձեռնություն, որն ուղղված է խաղաղության, սակայն նշում ենք, որ արցախցիների հարցը պետք է ստանա համապատասխան լուծում։ Չի կարող Արցախի հարցը համարվել լուծված, եթե արցախցին զրկված է իր հայրենիքից, գերեզմաններից, սրբություններից։ Այսօր այդ հարցի վրա աչք փակելը մեծ խնդիրներ է ստեղծում։ Այս հարցը պետք է լուծում ունենա՝ արժանապատիվ և անվտանգ վերադարձի տեսքով»։

Շահրամանյանը նաև անդրադարձավ քննադատությունների, որոնք հաճախ հնչում են արցախցիների հասցեին՝ «մնայիք, կռվեիք, չգայիք»։ Ասաց՝ դրանց լուրջ չի վերաբերվում.

«Նման արտահայտություններ անողներին չենք կարող լուրջ անձնավորություններ համարել»։