Պավել Դուրովին Նոբելյան մրցանակի են առաջադրել

Եվրասիական միջազգային համալսարանի ռեկտոր Կոնստանտին Կլիմենկոյից բացի ևս յոթ մարդ՝ երեք ռեկտոր և չորս պատգամավոր առաջարկել են Նոբելյան մրցանակի թեկնածու առաջադրել Ֆրանսիայում կալանավորված Telegram մեսենջերի հիմնադիր Պավել Դուրովին, РИА Новости հայտնել է համալսարանի ռեկտորը։

Ռեկտորը չի մանրամասնել՝ հատկապես ովքեր են դիմումներ ներկայացրել Նոբելյան կոմիտե, քանի որ կարծում է՝ այդ մարդկանց վրա ճնշում կգործադրվի։

Ավելի վաղ իր Telegram ալիքում համալսարանի ռեկտորը հայտարարել էր, որ պաշտոնական նամակ է ուղարկել Նոբելյան կոմիտե՝ Դուրովին Նոբելյան մրցանակ շնորհելու առաջարկով։

Դուրովը օգոստոսի 24-ին ձերբակալվել է Փարիզի Լը Բուրժե օդանավակայանում։ Հաջորդ օրը նրա կալանքը երկարացվել է մինչև 96 ժամ։ Փարիզի դատախազությունը նրան մեղադրում է, մասնավորապես, թմրամիջոցների ապօրինի շրջանառության, երեխաների դեմ հանցագործությունների և խարդախության մեջ մեղսակցության մեջ: Այլ կերպ ասած՝ նա Telegram-ի միջոցով այս և այլ իրավախախտումներ կատարողների հանցակից է համարվում։

Лента