«Ամեն ինչ լավ է լինելու»․ Փարավոն Միրզոյան

Մշակույթը ժամանակի արտացոլանքն է, արվեստագետները՝ այդ արտացոլանքը ներկայացնողները։ Հայ ստեղծագործողներն այս օրերին տարբեր զգացողություններ ունեն՝ ոմանք ստեղծագործական դադար են վերցրել, իսկ ոմանք էլ ստեղծագործում են՝ փորձելով դրանցում լույս, փրկություն տեսնել։ 

Հայաստանի ժողովրդական նկարիչ, «Վահան Թեքեյան» մրցանակակիր Փարավոն Միրզոյանը մշտապես ստեղծագործական պրոցեսի մեջ է։ Ինչպես Երևանի, այնպես էլ Գառնիի իր արվեստանոցում հաճախ է հյուրընկալում իր արվեստի երկրպագուներին, առհասարակ՝ արվեստասեր և մշակույթը գնահատող մարդկանց։ Ստեղծագործում է այն թեմատիկաներով, ինչ տիեզերքն է հուշում։ Այս պահին նկարիչը մտահոգ է երկրում տիրող իրավիճակով․խոտովանում է՝ փրկության լույսը ոչ թե ավագ, այլ կրտեր սերնդի և երիտասարդների մեջ է տեսնում, սակայն մի բանում վստահ է՝ հաջողության հասնելու համար պետք է տանջանք, ձգտում, կրթություն, մշակութային դաշտ։

Փարավոն Միրզոյանն արևի առաջին շողերի հետ շրջում է երևանյան բակերում, ափսոսանքով է նկատում՝ ոչ միայն քաղաքական մտքի զարգացում չկա, այլև ոչ մի բնագավառում զարթոնք չկա, իսկ մայրաքաղաքն ուղղակի չենք սիրում՝ աղտոտելուց մինչև ավելորդ աղմուկ։  Ստեղծագործողը, սակայն, փորձում է դիմադրել ժամանակներին, անդադար ստեղծագործում է՝ ցույց տալով մեր «ես»-ը, ազգային մտածողությունը։

Օրեր առաջ Փարավոն Միրզոյանն իր արվեստանոցում գտել է «Ժամանակի լույս», ստեղծագործությունը․ մութ ու ցուրտ տարիներին՝ 1991 թվականին ստեղծված կտավում նկարիչը լույս է պատկերել, քանի որ վստահ էր՝ հաղթելու էին։ Այսօր էլ՝ սեփական երկրի սխալների գիտակցումով հանդերձ, Փարավոն Միրզոյանը շարունակում է հավատալ լույսի հաղթանակին․ վրձինն է այդպես նկարում, իսկ վրձնին տիեզերքն է թելադրում ստեղծագործողի միջոցով։

Նկարիչը, որ ապրել և ստեղծագործել է տարբեր ժամանակներում, հեշտությամբ է ընկալում նոր ժամանակների պահանջները։ Երիտասարադների հետ շփվել շատ է սիրում, բայցև շատ պահանջկոտ է նրանց նկատմամբ, հատկապես երիտասարդ ստեղծագործողների, որոնց նա շարունակում է դասավանդել և սովորեցնել գույնի հետ աշխատելու, ազնիվ ստեղծագործելու, կերպարվեստում սեփական խոսքն ասելու հմտությունները։ 

Նկարչի արվեստանոցի կենտրոնում անավարտ աշխատանք կա՝ գորշ գույների միջից հառնում է փրկության սիմվոլը՝ հրեշտակը մանկան տեսքով․ «Ամեն ինչ լավ է լինելու»,-մեկնաբանում է Փարավոն Միրզոյանն ու նորից հիշեցնում՝ դա ոչ թե իր, այլ տիեզերքի թելադրանքն է։