ՆԱՏՕ-ն ամբողջ կոալիցիայով հանդերձ պատրաստվում է պատերազմի

ՆԱՏՕ-ում ամենաարմատական տարաձայնություններից մեկն ահաբեկչության և ռուսական գործողությունների սպառնալիքների վերաբերյալ դաշինքի անդամ երկրների տեսակետների անհամապատասխանությունն է: Ըստ The Wall Street Journal պարբերականի՝ ՆԱՏՕ-ի ծրագիր կազմողները համարում են, որ մոտ ապագայում «ուղղակի ռուսական ներխուժումը» դաշինքի սահմանակից անդամ երկիր քիչ հավանական է, սակայն Հյուսիսատլանտյան ռազմական դաշինքը կոալիցիայով հանդերձ կրկին սկսել է պատրաստվել պատերազմի։

Ընդ որում, դեռ վերջերս ՆԱՏՕ-ի երկրների ռազմական պաշտոնյաներից ոմանք պնդում էին, թե Մոսկվան կարող է բավական ուժեղ լինել մի քանի տարի անց հարձակում իրականացնելու համար։ The Wall Street Journal-ը գրելէ, թե կարճաժամկետ հեռանկարում ՆԱՏՕ-ում վախենում են, որ Ռուսաստանը կարող է հակամարտություն հրահրել հարևան երկրներում՝ տեղի ռուսներին դրդելով դիմել այդ քայլին և լարվածությունը որպես միջամտության պատրվակ օգտագործել, ինչպես Կրեմլն արեց արևելյան Ուկրաինայում մեկ տասնամյակ առաջ:

Այժմ ամբողջ կոալիցիայով հանդերձ պատերազմի պատրաստվելը դարձյալ ՆԱՏՕ-ի առաջնահերթություն է, ուստի դաշինքը նպատակ ունի «դաշնակիցներին պատրաստել ուս ուսի կռվելու համար։ Այդ նպատակով ՆԱՏՕ-ն այս տարի որոշեց անցկացնել 1988 թվականից ի վեր իր ամենամեծ՝ «Տոկուն պաշտպան» (Steadfast Defender) զորավարժությունը:

Զորավարժություններն անցկացվում են Եվրոպայում փետրվարից մայիս, որոնց մասնակցում է դաշինքի երկրների 90 հազար զինվորական։ ՌԴ Անվտանգության խորհրդի քարտուղար Նիկոլայ Պատրուշևը պնդում է, որ այս զորավարժությունների ընթացքում «մշակվում է Ռուսաստանի հետ զինված առճակատման սցենարը»։ 2023 թվականի նոյեմբերին Չեխիայի նախագահ Պետր Պավելը հայտարարել էր, որ ՆԱՏՕ-ն Ռուսաստանին համարում է Եվրոպայի թիվ մեկ սպառնալիքը։ 2024 թվականի հունվարին Դաշինքի գլխավոր քարտուղար Յենս Ստոլտենբերգը հայտարարել էր, թե Ռուսաստանի Դաշնությունից անմիջական սպառնալիքներ չի տեսնում։

Փետրվարին Bild-ը հրապարակել էր Գերմանիայի իշխանությունների սպասած «ՆԱՏՕ-ի վրա Ռուսաստանի հարձակման փուլերը», որոնցից մեկը ներառում է ռուսական զորքերի ներխուժումը գերմանական տարածք։ ՌԴ պաշտպանության նախարարության ղեկավար Սերգեյ Շոյգուն վստահեցրել է, որ Ռուսաստանը երբեք ՆԱՏՕ-ի երկրների վրա հարձակվելու մտադրություն չի ունեցել։