ՀԹՄՄ-ն ամփոփում է 2023 թվականը

Հայաստանի Թեքեյան մշակութային միության համար 2023 թվականն աչքի ընկավ արգասաբեր գործունեությամբ և նոր ձեռքբերումներով։  Միությունը բազմաթիվ միջոցառումների կազմակերպմամբ նպաստեց մշակութապահպանությանը, հայրենիք-սփյուռք կապի ամրապնդմանը։

Դեռ տարեսկզբին ՀԹՄՄ-ն կազմակերպեց ասեղնագործության վարպետներ Ծովակ Գանթարեաանի, Հուրի և Սալպի Իփեքճյանների և Աիդա Սանթուրյանի՝ «Արմատներ» խորագրով ասեղնագործ աշխատանքների ցուցադրությունը։ Ցուցադրվեց շուրջ երկու հարյուր աշխատանք, որոնցում արտացոլված էին հայկական ասեղնագործության նրբագեղ և յուրահատուկ կողմերը, դարերի պատմություն և նշանակություն ունեցող ասեղնակարերը։

«Մետաքսե գարուն» խորագրով ցուցադրությամբ ներկայացվեց նկարիչ-ստեղծագործողներ Արմենուհի Սաղդասարյանի, Գոհար Մաճկալյանի և Թանիա Մազեճեանի շուրջ 50 բատիկ աշխատանք։ Դրանք ներկայացնում էին հեղինակների ինքնատիպությունն ու թեմատիկ ուղղությունները՝ ազգային խորհրդանիշների գործածմամբ հայոց պատմություն և մշակույթ, հայկական տառարվեստ և մանրանկարչության առանձնահատկություններ՝ բատիկի նոր տեխնիկաների բացահայտմամբ և կիրառմամբ։

Ասեղնագործ և բատիկ հեղինակային և եզակի աշխատանքներն այսօր էլ ցուցադրվում են ՀԹՄՄ մշակութային հարթակում՝www.oasisart.am. Դա հնարավորություն է տալիս ոչ միայն ծանոթանալ հայազգի հայտնի ստեղածոգործողներին, այլև առցանց գնել դրանք:

Միությունը կազմակերպեց գրքերի շնորհանդեսներ և ֆիլմերի դիտումներ․ կայացավ կինոռեժիսոր Հրանտ Հակոբյանի՝ «Կինոռեժիսորի իմ հուշերն ու խոհերը» գրքի շնորհանդեսը և «Մեր Արմենակը» վավերագրական ֆիլմի ցուցադրությունը․ ֆիլմ՝ արգելված անվան՝ Թուրքիայում ձախակողմյան կուսակցության պարագլուխ Արմենակ Բաքրճյանի (Օրհան Բաքըր) մասին

Կայացավ հայ անվանի գործարար և բարերար, հրապարակախոս Հայաստանի Թեքեյան մշակութային միության անդամ Ռուբեն Գրիգորյանի՝ «Իմ որդին գնում է պատերազմ» գրքի շնորհանդեսը։

ՀԹՄՄ «Ադամանդակուռ Արարատ» շքանշանակիր, «Հայկաշեն Ուզունյան» գրական մրցանակակիր, խմբագիր, մատենագետ, հրատարակիչ Ժիրայր Դանիելյանին նվիրված՝ «Անկրկնելի Ժիրայր Դանիէլեանը» գրքի շնորհանդեսը կարծես յուրատեսակ գնահատական լիներ նրա ծառայությանը հայ մշակույթին, դպրոցին, հայ համայնքին և ամենատարբեր ոլորտներին։

Հայաստանի Թեքեյան մշակութային միությունը կազմակերպեց նաև ականավոր պետական գործիչ, գիտնական, ՀԹՄՄ «Ադամանդակուռ Արարատ» շքանշանակիր Ֆադեյ Սարգսյանի 100-ամյակին նվիրված երեկո։  Ձեռնարկի նպատակն էր արժևորել և ըստ արժանվույն գնահատել
Խորհրդային Միության ու նրա սահմաններից դուրս մեծ համբավ ունեցող գործչին, հզոր անհատականությանը։

Միությունն իրականացրեց նաև սպասված և մեծ հեղինակություն վայելող ամենամյա «Վահան Թեքեյան» մրցանակաբաշխությունը՝ գնահատելու և խրախուսելու մշակույթի և գիտության տարբեր բնագավառների լավագույններին։

Այս տարի մրցանակ հանձնվեց 4 անվանակարգում՝ Գրականություն, Հայագիտություն, Կերպարվեստ և Դեկորատիվ-կիրառական արվեստ։ Մրցույթին մասնակցելու հայտ էր ներկայացրել շուրջ 55 մասնակից. հանձնաժողովն ընտրել է նրանցից լավագույններին:

Ի դեպ, «Կերպարվեստ» անվանակարգի հաղթող գեղանկարիչ Մելքոն Հովհաննիսյանի «Մոռացված մեղեդի» խորագրով ցուցահանդեսի բացմամբ Միությունն ամփոփեց մշակութային տարին։

Հարկ է ընդգծել, որ Միությունը շարունակում է հայապահպանությանն ու հայ մշակույթի զարգացմանն ուղղված ծրագրերը։ Այդ շրջանակներում ստեղծվել է www.oasisart.am հարթակը, որում համախմբվել են ժամանակակից ստեղծագործողներ՝ գեղանկարիչներ, մշակույթի տարբեր ոլորտների վաստակաշատ հեղինակներ։ Հարթակում ցուցադրված են նրանց հեղինակային, ձեռագործ և եզակի ստեղծագործությունները՝ գնելու հնարավորությամբ։

Հայաստանի Թեքեյան մշակութային միությունն արդենիսկ նախանշել է ծրագրեր և անելիքներ, որոնք իրագործելու է 2024 թվականին՝ ի նպաստ հայապահպանության, հայկական մշակույթի զարգացման և տարածման։