Մակրոնը մտադիր է Սի Ծինփինի Ֆրանսիա այցի ժամանակ ճնշում գործադրել նրա վրա

Չինաստանի նախագահ Սի Ծինփինը կիրակի այցով մեկնում է Փարիզ, իսկ նրա ֆրանսիացի գործընկեր Էմանուել Մակրոնը մտադիր է ճնշում գործադրել նրա վրա՝ նպատակ ունենալով կրճատել առևտրային անհավասարակշռությունը և փորձել համոզել նրան օգտագործել իր ազդեցությունը Ռուսաստանի վրա՝ կապված Ուկրաինայի պատերազմի հետ, գրում է Reuters-ը։

Գործակալությունն ընդգծում է, որ այս նպատակներից ոչ մեկին հեշտ չի լինի հասնել Ֆրանսիայում Սիի երկօրյա այցի ընթացքում, ուր նա ժամանում է Եվրոպայի և Չինաստանի միջև առևտրային լարվածության աճի պահին:

Լրատվամիջոցը նշում է, որ Ֆրանսիան աջակցում է Եվրամիության հետաքննությանը Չինաստանից էլեկտրամոբիլների արտահանման վերաբերյալ, իսկ հունվարին Պեկինը հետաքննություն է սկսել կոնյակի ներմուծման հարցով, որը հիմնականում արտադրվում է Ֆրանսիայում, մի քայլ, որը շատերը գնահատում են որպես պատասխան քայլ  ԵՄ-ի հետաքննությունների աճի ֆոնին: 

«Մենք պետք է շարունակենք պնդել, որ Չինաստանի իշխանությունները մեզ ավելի շատ երաշխիքներ տան առևտրային հարցերի վերաբերյալ», - գործակալությանն է ասել Ելիսեյան պալատի խորհրդականը՝ Սի Ծինփինի այցից առաջ, ինչը նրա առաջին այցն է Եվրոպա վերջին հինգ տարում:

Սի Ծինփինը Ֆրանսիա կժամանի մոտ 16:00-ին (1400 GMT): Նրա պաշտոնական հանդիպումները կներառեն համատեղ բանակցություններ Մակրոնի և Եվրահանձնաժողովի նախագահ Ուրսուլա ֆոն դեր Լայենի հետ։

Եվրամիության անդամ 27 երկրների, մասնավորապես Ֆրանսիայի և Գերմանիայի միջև տարաձայնությունները ձախողում են Չինաստանի վրա ազդելու նրանց կարողությունը: Գերմանիայի կանցլեր Օլաֆ Շոլցը չի միանա Մակրոնին և Սի Ծինփինին Փարիզում՝ նախկինում ստանձնած պարտավորությունների պատճառով, հայտնում են աղբյուրները։

Ըստ պաշտոնյաների, Ֆրանսիան նաև կձգտի առաջընթաց գրանցել չինական շուկան իր գյուղատնտեսական ապրանքների արտահանման համար բացելու գործում և լուծելու մտավոր սեփականության իրավունքների առիթով ֆրանսիական կոսմետիկայի արդյունաբերության հետ կապված մտահոգությունները: