«Ֆրանսիան սրում է իրավիճակը». Ադրբեջանի ԱԳՆ

«Չնայած Ադրբեջանի համաձայնության հիման վրա գրեթե 25 տարի Ֆրանսիայի միջնորդի դերին, 2020 թվականի  պատերազմից հետո այս երկրի ակնհայտ հակաադրբեջանական քայլերը հայտնի են բոլորին.  հայտարարել է Ադրբեջանի ԱԳՆ մամուլի քարտուղար Այխան Հաջիզադեն։

«Չնայած ֆրանսիական կողմն Ադրբեջանին մեղադրում է  միակողմանի գործողությունների մեջ, մեր երկրի քայլերն ու պաշտոնական հայտարարությունները Ֆրանսիայի հասցեին ընդամենը պատասխան են այս երկրի ապակառուցողական գործունեությանը։ Չնայած մեր երկրի դեմ զրպարտչական արշավին, մենք միշտ բաց ենք եղել երկխոսության համար»,- ասել է նա։

Հաջիզադեի խոսքով, Ֆրանսիան լրջորեն կասկածի տակ է դրել ինքնիշխանության և տարածքային ամբողջականության հիման վրա Ադրբեջանի և Հայաստանի միջև հարաբերությունների կարգավորմանն ուղղված ջանքերը, մասնավորապես վերջին երեքուկես տարիների ընթացքում ձեռնարկված քայլերը՝ դրանով իսկ սրելով իրավիճակը։

«Ֆրանսիայի կողմից Ադրբեջանի դեմ փաստաթղթերի  նախաձեռնումը  ՄԱԿ-ի Անվտանգության խորհրդում, ԵՄ-ում, Ֆրանկոֆոնիայի կազմակերպությունում և այլ միջազգային հարթակներում, ապացուցեցին այս երկրի՝ որպես չեզոք միջնորդի պնդումների լիակատար անհիմն լինելը»,- ասել է Հաջիզադեն։

Հաջիզադեն խոսել է  Ֆրանսիայում տիրող «ադրբեջանաֆոբիայի մթնոլորտի և Ադրբեջանի դեսպանատների վրա կրկնվող հարձակումների ու դրանք Ֆրանսիայի կառավարության կողմից չճնշվելու մասին»։

«Միևնույն ժամանակ,  Ֆրանսիան համակողմանիորեն զինում է Հայաստանին և նպաստում տարածաշրջանում ռազմատենչությանը։  Ադրբեջանական կողմը բազմիցս հայտարարել է Ֆրանսիային, որ սպառնալիքների և ճնշումների լեզվով խոսելն արդյունքի չի բերի, և ևս մեկ անգամ հայտարարում է, որ Ադրբեջանը կձեռնարկի բոլոր անհրաժեշտ միջոցները իր ազգային շահերը պաշտպանելու համար»,- ասել է Հաջիզադեն։