Սա ձեռքբերում է եւ Ադրբեջանի համար, բայց ես ուզում եմ նաեւ ընդգծել, որ սա էական ձեռքբերում է Հայաստանի համար. Փաշինյան

«Ոսկեպարում, ըստ էության, արձանագրվել է այն, ինչը մենք պայմանավորվել ենք ոսկեպարցիների հետ:
 Ես նաեւ մեր սիրելի ոսկեպարցիներին ասացի՝ գիտեմ, հենց թուղթ ստորագրվի, գալու են ասեն՝ վայ, էս էն չի, էս ուրիշ բան էր, ուրիշ բան ասեցին, ուրիշ բան արեցին: Ես դահլիճի ներսում իրենց ասացի՝ խնդրում եմ չհավատաք, որովհետեւ այն, ինչ պայմանավորվել ենք, ամեն ինչ հենց այդպես է:
Նույնը վերաբերում է Կիրանցին, մեր խոսակցությունների ժամանակ մենք շատ աշխատանքային դետալների մեջ չենք խորացել, բայց նաեւ ուզում եմ ասել, որ եւ Կիրնցում, եւ Ոսկեպարում ես ասել եմ, որ եթե հանկարծ սահմանազատման գործընթացում կպարզվի, որ ինչ-որ տների, ինչ-որ հողամասերի հետ կապված խնդիր կա, բնականաբար, մենք մեր բոլոր քաղաքացիների  իրավունքներին տեր կկանգնենք: Այնտեղ, որտեղ անհրաժեշտ կլինեն այլ լուծումներ, մենք նույն բնակավայրում նոր տներ կկառուցենք»,-այսօր ասել է Փաշինյանը:

Սա ձեռքբերում է եւ Ադրբեջանի համար, բայց ես ուզում եմ նաեւ ընդգծել, որ սա էական ձեռքբերում է Հայաստանի համար. ապրիլի 20-ին, Ստեփանավանում լրագրողների հետ զրույցում ասել է Փաշինյանը։

Նրա խոսքից պարզ է դառնում, որ շատ գոհ է Հայաստանի ու Ադրբեջանի միջև ձեռք բերված պայմանավորվածությունից։

«Ըստ էության, Հայաստանն ու Ադրբեջանը արդեն երկկողմանի ստորագրություններով հաստատեցին միմյանց տարածքային ամբողջականության ճանաչումը: Հաստատեցին, որ սահմանազատման գործընթացում ոչ թե նոր սահման է ստեղծվել, այլ վերարտադրվելու է ԽՍՀՄ փլուզման պահին դե յուրե իրավական նշանակություն ունեցող սահմանը: Սա կարեւոր նրբություն է, որովհետեւ գիտեք, որ 1988-1991 թվականներին որոշակի շարժեր են եղել, իրադարձություններ են եղել: Այս քննարկումների ժամանակ առանցքային բանավեճերից մեկը նա էր, թե ինչպես ձեւակերպել, որ հենց նկատի առնվի ԽՍՀՄ փլուզման պահին դե յուրե իրավական նշանակություն ունեցող սահմանների վերարտադրման փաստը:

Ես ուզում եմ  նաեւ արձանագրել, որ այս իրադարձությունը համարում եմ անկյունաքարային մեր ինքնիշխանության, անկախության, զարգացման  հաջորդ փուլի համար: Այս անկյունաքարի շուրջ մենք պետք է կարողանանք կառուցման, ստեղծման գործընթացն իրականացնել»,-ասաց նա՝ հավելելով, որ այս որոշումը էականորեն նվազեցնելու է անվտանգային ռիսկերը, որը մենք ունենք ՀՀ սահմանի ամբողջ երկայնքով:

Մենք հիմա պայմանավորվել ենք սահմանի այս հատվածի վերաբերյալ, բայց նաեւ հիմնարար սկզբունք ենք որդեգրել սահմանազատման հետագա ողջ գործընթացի համար, ինչը նշանակում է, որ բոլոր վիճահարույց հարցերը արդեն ձեռք բերված պայմանավորվածությունների համաձայն նստել եւ բանակցային սեղանի շուրջ լուծել»,- ասել է նա: