06-05-2024 | 15:41
Խոր վշտով տեղեկացանք Հայաստանի Թեքեյան մշակութային միության անդամ, բանասիրական գիտությունների դոկտոր, պրոֆեսոր Սերգո Երիցյանի անժամանակ մահվան լուրը։
Սերգո Երիցյանը ծնվել է 1957 թվականին, 1975-1978 թթ. սովորել է ԵՊՀ բանասիրական ֆակուլտետում, 1978-1981 թթ.` Մոսկվայի Մ. Վ. Լոմոնոսովի անվան պետական համալսարանի ժուռնալիստիկայի ֆակուլտետում, ապա` նույն մասնագիտության ասպիրանտուրայում։ 1981 թվականից Սերգո Երիցյանը դասավանդել է տարբեր բուհերում` Մոսկվայի Մ. Վ. Լոմոնոսովի անվան պետական համալսարանում, ԵՊՀ-ում, Մանկավարժական համալսարանում։
Բազմաթիվ գրքերի, մասնագիտական ձեռնարկների, գիտական հրապարակումների հեղինակ է։ Նրա գրականագիտական և լրագրողական ծանրակշիռ վաստակում առանձնանում են տասնյակ գիտական աշխատություններ` մենագրություններ, մասնագիտական բառարաններ, ձեռնարկներ, ինչպես նաև հեռուստահաղորդումներ, որոնք մինչ օրս հիշում են հեռուստադիտողների բազում սերունդներ։ Հարկ է առանձնակի կարևորել նրա մեծագույն ներդրումը հայ- չինական բարեկամական հարաբերությունների հաստատման գործում։ Ընդամենը վերջերս նրա խմբագրությամբ հրատարակվեց «Չինական գրականության անթալոգիա» գիրքը։
Չափազանց դժվար է սփոփանքի խոսքեր գտնել Սերգո Երիցյանի` մերօրյա լավագույն մտավորականներից մեկի կորուստը սփոփելու համար։ Սերգո Երիցյանը Հայաստանի մշակութային միության լավագույն բարեկամներից էր. Միության նախաձեռնությամբ բազմիցս կազմակերպվել է Սերգո Երիցյան մանկավարժի և գիտնականի մեծարժեք գրքերի շնորհանդեսները։
Նա իր ներկայությամբ մշտապես պատվում էր Միության միջոցառումները, նպաստում մշակութապահպան ծրագրերին։ Սերգո Երիցյանի բացակայությունը մեծ կորուստ է բոլորիս համար։ Ներկա և ապագա լրագրողները դեռ երկար ժամանակ կհետևեն երիցյանական մասնագիտական գրչին, իսկ նրա գրականագիտական և մասնագիտական ձեռնարկերը դեռ երկար ժամանակ պահանջված կլինեն ոլորտներն ուսումնասիրողների համար։ Այս դժվարին պահին սփոփանքի և վշտակցության խոսքեր ենք ուղղում Սերգո Երիցյանի հարազատներին, գործընկերներին։ Նրա հիշատակը միշտ վառ կմնա բոլորիս հուշերում։
Հայաստանի Թեքեյան մշակութային միության կենտրոնական վարչություն
Նախագահ` Ռուբեն Միրզախանյան