Տեսանյութ. Ռուս խաղաղպահները դուրս են գալիս Արցախից

Ռուս խաղաղապահները սկսել են լքել Լեռնային Ղարաբաղը. տեղեկությունը հաստատել է Կրեմլի խոսնակ Դմիտրի Պեսկովը։

«Այո, դա ճիշտ է»,- ասել է ՌԴ նախագահի մամուլի քարտուղարը։

Ավելի վաղ այս մասին հաղորդումներ էին տարածել հայկական և ադրբեջանական լրատվամիջոցները. գրել է Lenta.ru-ն։

Ըստ Ադրբեջանի նախագահի օգնական Հիքմեթ Հաջիևի՝ Ղարաբաղից խաղաղապահների դուրսբերման որոշումը կայացվել է Ռուսաստանի և Ադրբեջանի բարձրագույն ղեկավարության՝ Վլադիմիր Պուտինի և Իլհամ Ալիևի կողմից։

Ռուսաստանի արտաքին գործերի նախարարությունն իր հերթին չի մեկնաբանել ռուսական խաղաղապահ կոնտինգենտի դուրսբերման հետ կապված իրավիճակը և խորհուրդ է տվել այդ մասին կապ հաստատել պաշտպանության նախարարության հետ։

Ինչպես ավելի վաղ նշել էր ՌԴ փոխարտգործնախարար Միխայիլ Գալուզինը, այն բանից հետո, երբ Հայաստանը ճանաչեց Ղարաբաղը որպես Ադրբեջանի մաս, Մոսկվան խաղաղապահների հետ կապված բոլոր հարցերը քննարկում է միայն Բաքվի հետ։

Տեսեք, թե ինչ է գրել Lenta.ru-ն։

Azg.am-ը բառացիորեն մեջբերում է հոդվածի այդ հատվածը։ Ուշադրություն դարձրեք, որ բավական չէ, որ ռուսները հայկական Քարվաճառն անվանում են ադրբեջանական Քելբաջար, հայկական Դադիվանքն էլ անվանում են աղվանական Խուդավանգ։

«Ավելի վաղ ադրբեջանական լրատվամիջոցները գրել էին, որ խաղաղապահների առաջին անձնակազմն ու զինտեխնիկան օրեր առաջ լքել է Քելբաջարի շրջանում գտնվող աղվանական Խուդավանգ տաճարի տարածքը։ Այժմ վանքը հսկում է ադրբեջանական ոստիկանությունը։ Կադրեր են տարածվել նաև այն մասին, թե ինչպես է ռուսական տեխնիկայի շարասյունը անցնում Ադրբեջանի Ղարաբաղին հարակից շրջաններով»։

Այնուհետև ռուսական լրատվամիջոցը գրում է, որ ռուս խաղաղապահները տեղակայվել են Ղարաբաղի տարածքում 2020 թվականի նոյեմբերի 9-ին Ադրբեջանի, Ռուսաստանի և Հայաստանի ղեկավարների կողմից ստորագրված եռակողմ հռչակագրի համաձայն։ Խաղաղապահ զորախումբը տեղակայված էր շփման գծի և Լաչինի միջանցքի երկայնքով՝ բաղկացած 1960 զինվորականից, 90 զրահամեքենայից, 380 միավոր ավտոմոբիլային և հատուկ տեխնիկայից և պետք է այնտեղ մնար հինգ տարի՝ մինչև 2025 թվականը։

Ադրբեջանական տելեգրամյան ալիքներով տեսանյութեր են տարածվել, թե ինչպես են ադրբեջանցիները ծափերով ճանապարհում ռուս խաղաղապահներին։