Ցուցադրություն՝ մրցույթից առաջ

Թեքեյան կենտրոնի ցուցասրահում բացվեց «Վահան Թեքեյան» ամենամյա մրցանակաբաշխության «Կերպարվեստ» անվանակարգում ներկայացված աշխատանքների ցուցադրությունը։

Միջազգային մրցութին մասնակցելու հայտ էր ներկայացրել 25 հեղինակ, որոնց թվում էին ինչպես արվեստասերներին հայտնի, այնպես էլ կերպարվեստի ոլորտում սկսնակ անուններ։

ՀԹՄՄ կենտրոնական վարչության նախագահ Ռուբեն Միրզախանյանը ողջունեց ցուցադրության այցելուներին և շնորհավորեց մասնակիցներին։ Վերջինս վստահեցրեց, որ ամեն տարի նկատելի են որակական նոր մակարդակ ապահովող աշխատանքներ։ 

Ռուբեն Միրզախանյանը կարևորեց մրցույթին մասնակցությունը, որին մասնակցել և մրցանակների են արժանացել անվանի գեղանկարիչներ Էմիլ Գազազը, Վարուժան Վարդանյանը, Սարգիս Համալբաշյանը, Գևորգ Եղիազարյանը, Կարեն Աղամյանը, Միքայել Հարությունյանը և այլք։

«Կերպարվեստ» անվանակարգում հանձնաժողովը ղեկավարում է «Վահան Թեքեյան» մրցանակակիր Արա Հակոբյանը։ Նա բազմիցս եղել է ամենամյա մրցանակաբաշխության հանձնաժողովի կազմում և մեծ պատիվ է համարում այս անվանակարգի նախագահը լինելու հանգամանքը։ Վերջինս հավելեց, որ հանձնաժողովը դժվարին խնդրի առջև է կանգնել, քանի որ ներկայացված են մոնումենտալ և լուրջ աշխատանքներ։ Մրցանակը մեկն է, լավագույն աշխատանքները՝ մի քանիսը։ Փորձառու արվեստագետների կողքին նորաթուխ ստեղծագործողների աշխատանքներ են, որոնք չեն զիջում իրենց գեղարվեստական արժեքով։

«Թվում է, թե 21-րդ դարում նախապատվությունը տրված է միայն նորարարություններին, համակարգչային դիզայնին կամ այլ մոտեցումներին, բայց այստեղ ներկայացված են պրոֆեսիոնալ մակարդակի աշխատանքներ։ Տեսնում ենք գրագիտություն՝ նորարական մոտեցումներով։ Սա խոսում է նրա մասին, որ հեղինակներն ամենայն լրջորեն են վերաբերում մրցույթին և ներկայացնում իրենց լավագույն ստեղծագործությունները»,-նշեց Արա Հակոբյանն ու հաջողություն մաղթեց մասնակիցներին։

ԱՄՆ և Կանադայի Թեքեյան մշակութային միության նախագահ, ՀՀ ԳԱԱ արտասահմանյան անդամ  Երվանդ Ազատյանը նույնպես շնորհավորեց ցուցադրության մասնակիցներին։ 

Նշենք, որ «Վահան Թեքեյան» մրցանակաբաշխությունն ամենամյա ձեռնարկ է, որին   մասնակցել ինչպես Հայաստանից, այնպես էլ նրա սահմաններից դուրս։ Միջազգային մրցույթն անցկացվում է 27-րդ անգամ։ Այս տարի այն անցկացվում է 6 անվանակարգում՝ Գրականություն, Լրագրություն, Գեղարվեստական լուսանկարչություն, Կերպարվեստ, Հայագիտություն և Թատերական արվեստ։ Յուրաքանչյուր անվանակարգի համար մրցանակը 1500 ԱՄՆ դոլար է։